ആപ്പിള്‍ കാതലിലെ മരണം

ഗോപാല്‍ ഹൊനാല്‍ഗെരെ

മൊഴിമാറ്റം: പി. എൻ ഗോപീകൃഷ്ണൻ

അങ്ങനെ, ഒരു രാത്രിയില്‍
മരണമെന്നു പേരുള്ള
ഒരു രാത്രിപ്പാറ്റ
പച്ച ആപ്പിളിന്‍റെ കാതലിലേയ്ക്ക്
ഒരു തുരങ്കം കുഴിച്ചു.
അതിന്റെ വിത്തുകളെത്തിന്ന്
പകരം രണ്ടു മുട്ടകളിട്ട്
പറന്നുപോയി.

ഇങ്ങനെ, പഴയ ആദം
ചുവന്നുപഴുത്ത ആപ്പിള്‍
രണ്ടായി മുറിച്ചപ്പോള്‍
പ്രിയപ്പെട്ട ഹവ്വയുടെ കണ്ണുകള്‍ പോലെ
കറുത്ത
രണ്ടു രാത്രിപ്പാറ്റകള്‍
പറന്നുപോകുന്നതു കണ്ടു.

അത്ഭുതപ്പെട്ട്, അയാള്‍ ചോദിച്ചു.

“എങ്ങനെ ഈ പാറ്റകള്‍
ആപ്പിള്‍ക്കാതലില്‍ കടന്നു?
ഒരു ദ്വാരം പോലും നിര്‍മ്മിക്കാതെ?

നമ്മുടെ തലയില്‍
പൊടുന്നനെ കടന്നെത്തുന്ന
ആലോചനകള്‍ പോലെ.”

ഗോപാൽ ഹൊനാൽഗെരെ

1942-ല്‍ കര്‍ണാടകയിലെ ബിജപൂരില്‍ ജനനം. ഇംഗ്ലീഷില്‍ കവിതകളെഴുതി. പഞ്ചാഗ്നി, വിജയവാഡ, പഞ്ചാബ് എന്നിവിടങ്ങളിലെ വിവിധ വിദ്യാലയങ്ങളില്‍ അധ്യാപകനായി സേവനമനുഷ്ടിച്ചു, ജീവിതത്തിലെ അവസാനകാലം ബാംഗ്ലൂരിലെ ഒരു വൃദ്ധസദനത്തിലായിരുന്നു. കാന്‍സര്‍ ബാധിതനായതിനെ തുടര്‍ന്ന്2003-ല്‍ ഡൽഹിയിൽ അന്തരിച്ചു. സെന്‍ ആന്‍ഡ് വൈല്‍ഡ് ഇന്നസെന്റ്സ് (1973), ജെസ്റ്റര്‍ ഓഫ് ഫ്ലെഷ്ലെസ് സൌണ്ട് (1975), വാഡ്‌ ഓഫ് പോയംസ് (1975), ദ ഫിഫ്ത്ത് (1980) തുടങ്ങി ആറോളം കവിതാസമാഹാരങ്ങള്‍.